صبح صادق کوسو، مير: نامور سياستدان مير صبح صادق خان ولد مير حسن کوسو 1926ع ڌاري ڳوٺ دين پور، تعلقي ٺل، ضلعي جيڪب آباد ۾ پيدا ٿيو. سندس والد ڏهن سالن جي عمر ۾ وفات ڪئي. انگريز سرڪار سندس ملڪيت رحيم بخش کوسي کي ٺيڪي تي ڏني ۽ ٻنهي ڀائرن مير صبح خان ۽ عبدالمجيد کي پڙهڻ لاءِ ڪراچي موڪليو. جتي علامه آءِ. آءِ قاضي وٽ رهندا ۽ پڙهندا هئا. هن پنهنجي سموري تعليم سينيٽري اسڪول ڪراچي ۽ ڪيمبريج اسڪول ڪراچيءَ مان حاصل ڪئي. نواب اڪبر بگٽي سندس هم ڪلاسي هو. مير صبح صادق واپس ڳوٺ آيو.
هن سياست جي شروعات جمعيت علماءِ کان ڪئي. بعد ۾ ايم. آر. ڊي تحريڪ ۾ سرگرم ٿيو. مير صبح صادق ضياءَ الحق جي حڪومتي دؤر ۾ صحت کاتي جو وفاقي وزير رهيو، پر جلد کاتو ڇڏي ڏنائين. پاڻ جيڪب آباد ضلعي جو نامور سياستدان هو. هيءُ جيڪب آباد ضلعي جو پهريون شخص هو. جنهن ضلعي ۾ زرعي مشينري متعارف ڪرائي. هن سياست ۾ رهڻ دوران علائقي ۾ ڪيترائي ترقياتي ڪم ڪرايا. علائقي ۾ روڊ، رستا پڪا ڪرڻ سميت اسڪول، بجلي، گئس جون سهوليتون مهيا ڪرڻ لاءِ ڪوشان رهيو. هن 10 سيپٽمبر 2008ع تي وفات ڪئي. سندس آخري آرامگاهه ڊفينس ڪراچي قبرستان ۾ آهي. کيس ٻن پٽن ۽ ٽن نياڻين جو اولاد ٿيو.
2008.09.10 عيسوي
مير صبح صادق خان ولد مير حسن کوسو 1926ع ڌاري ڳوٺ دين پور، تعلقي ٺل، ضلعي جيڪب آباد ۾ پيدا ٿيو.هن 10 سيپٽمبر 2008ع تي وفات ڪئي. سندس آخري آرامگاهه ڊفينس ڪراچي قبرستان ۾ آهي.